നദീസംയോജന വിധി ബാധകമല്ലെങ്കിലും കരുതലായി നിയമനടപടി സ്വീകരിക്കും
നദീസംയോജനം കേരളത്തിനു ബാധകമാവില്ലെന്നാണ് നിയമോപദേശമെങ്കിലും സുപ്രീംകോടതി ഈ ആശയത്തെ പൊതുവില്‍ ഗുണകരമെന്ന് വിശേഷിപ്പിക്കുന്ന സാഹചര്യത്തില്‍ ആവശ്യമായ കരുതല്‍, നിയമനടപടികള്‍ സംസ്ഥാനം സ്വീകരിക്കുമെന്ന് മുഖ്യമന്ത്രി ഉമ്മന്‍ചാണ്ടി നിയമസഭയില്‍ അറിയിച്ചു. സുപ്രീംകോടതിയെ വീണ്ടും സമീപിക്കേണ്ട ആവശ്യമുണ്ടെങ്കില്‍ അതും ചെയ്യും. കെ. ശിവദാസന്‍നായരുടെ സബ്മിഷന് മറുപടി നല്‍കുകയായിരുന്നു മുഖ്യമന്ത്രി. നദീസംയോജനം കേരളത്തിന് ഒരു കാരണവശാലും സ്വീകാര്യമല്ലെന്ന് മുഖ്യമന്ത്രി പറഞ്ഞു. പമ്പയും അച്ചന്‍കോവിലും ഇവിടെത്തന്നെ ഉത്ഭവിച്ച് ഇവിടെ അവസാനിക്കുന്ന നദികളാണ്. സുപ്രീംകോടതിയുടെ ഉത്തരവില്‍ത്തന്നെ കേരളത്തിന് ഇത് സ്വീകാര്യമല്ലെന്ന് വ്യക്തമാക്കിയിട്ടുണ്ട്.
നമുക്ക് കിട്ടിയിട്ടുള്ള ഉപദേശവും സംസ്ഥാനത്തിനു ബാധകമാവില്ല എന്നാണ്. എങ്കിലും ഇതു കേരളത്തിന്റെ ജീവന്മരണപ്രശ്‌നമാണ്. അതുകൊണ്ടു തന്നെ മുതിര്‍ന്ന അഭിഭാഷകരുമായി ചര്‍ച്ച ചെയ്യും. സുപ്രീംകോടതിയെ വീണ്ടും സമീപിക്കാന്‍ തയാറാകുമോ എന്നു കോടിയേരി ബാലകൃഷ്ണന്‍ ആരാഞ്ഞപ്പോഴാണ് ആവശ്യമെങ്കില്‍ അതും ചെയ്യുമെന്ന് ഉമ്മന്‍ചാണ്ടി അറിയിച്ചത്.
പോസ്റ്റുകള്
