സഭയ്ക്കുള്ളില് കള്ളവോട്ട്: പ്രതിപക്ഷ നടപടി ഭീരുത്വമെന്ന് മുഖ്യമന്ത്രി
തിരുവനന്തപുരം: ധനവിനിയോഗ ബില്ലിന്റെ വോട്ടെടുപ്പിന്റെ വീഡിയോ പ്രദര്ശനത്തില്നിന്ന് പ്രതിപക്ഷം ഇറങ്ങിപ്പോയില്ലായിരുന്നു എങ്കില് അവര്ക്ക് തലയില് മുണ്ടിട്ട് നടക്കേണ്ടി വരുമായിരുന്നു എന്ന് മുഖ്യമന്ത്രി ഉമ്മന് ചാണ്ടി. സ്വയം ഉന്നയിച്ച ആരോപണത്തിന്റെ നിജസ്ഥിതി പരിശോധിക്കാന് കിട്ടുന്ന അവസരത്തില്നിന്ന് ഒളിച്ചോടുന്നത് ഭീരുത്വമാണെന്ന് അദ്ദേഹം ആരോപിച്ചു. വോട്ടെടുപ്പില് യുഡിഎഫിന്റെ ഒരു എംഎല്എയ്ക്കു പകരം മറ്റൊരാള് കള്ളവോട്ട് ചെയ്തുവെന്നായിരുന്നു പ്രതിപക്ഷ ആരോപണം. ഇതേത്തുടര്ന്നാണ് നടപടി ക്രമങ്ങളുടെ വീഡിയോ ദൃശ്യങ്ങള് പരിശോധിക്കണമെന്ന് മുഖ്യമന്ത്രി സ്പീക്കറോട് അഭ്യര്ഥിച്ചത്.