ജനസമ്പര്ക്ക കേന്ദ്രത്തിന് ഒരു വയസ്സ്; പതിനായിരത്തോളം പരാതികള്
തിരുവനന്തപുരം: മുഖ്യമന്ത്രിയുടെ ജനസമ്പര്ക്ക കേന്ദ്രം ഒരു വര്ഷം പൂര്ത്തിയാക്കുന്നു. ഇവിടെ ഇതുവരെ മുഖ്യമന്ത്രി നേരിട്ട് സ്വീകരിച്ചത് 9116 പരാതികള്. മുഖ്യമന്ത്രി തിരുവനന്തപുരത്തുണ്ടായിരുന്ന 134 ദിവസങ്ങളില് സെക്രട്ടേറിയറ്റിനു മുന്നിലുള്ള ജനസമ്പര്ക്ക കേന്ദ്രം തുറന്നിരുന്നു.
ഉച്ചകഴിഞ്ഞ് മൂന്നിനാണ് മുഖ്യമന്ത്രി ജനസമ്പര്ക്ക കേന്ദ്രത്തില് എത്തുന്നത്. തിങ്കള്, ചൊവ്വ, ബുധന്, വ്യാഴം ദിവസങ്ങളിലാണ് സാധാരണ ഇത് നടക്കുന്നത്. ശരാശരി എഴുപതോളം പേര് പരാതിയുമായി എത്തുന്നുവെന്നാണ് കണക്കാക്കുന്നത്. മുഖ്യമന്ത്രി പരാതി സ്വീകരിച്ചാല് പ്രശ്നം രേഖപ്പെടുത്തി നമ്പര് നല്കി പരാതിക്കാരനു തന്നെ നല്കും. പരാതിക്കാരന് അത് ബന്ധപ്പെട്ട ഉദ്യോഗസ്ഥന് കൈമാറും.
മുഖ്യമന്ത്രിയുടെ ഓഫീസിലും ചേംബറിലുമായി നടന്ന പരാതി സ്വീകരിക്കലാണ് ജനസമ്പര്ക്ക കേന്ദ്രത്തിലേക്ക് മാറ്റിയത്.