വിദ്യാഭ്യാസ വായ്പയ്ക്ക് പിഴപ്പലിശ ഈടാക്കില്ലെന്ന് ബാങ്കുകള് സമ്മതിച്ചു
വിദ്യാഭ്യാസ വായ്പയ്ക്ക് പിഴപ്പലിശ ഒരു കാരണവശാലും വാങ്ങരുതെന്ന സര്ക്കാര് നിര്ദ്ദേശം ബാങ്കുകള് തത്വത്തില് അംഗീകരിച്ചിട്ടുണ്ടെന്ന് മുഖ്യമന്ത്രി ഉമ്മന്ചാണ്ടി നിയമസഭയില് അറിയിച്ചു. വിദ്യാഭ്യാസവായ്പ എടുത്ത വിദ്യാര്ഥികളും രക്ഷിതാക്കളും അനുഭവിക്കുന്ന പ്രശ്നങ്ങളെക്കുറിച്ച് പി.സി ജോര്ജ് അവതരിപ്പിച്ച ശ്രദ്ധക്ഷണിക്കല് പ്രമേയത്തിന് മറുപടി നല്കുകയായിരുന്നു അദ്ദേഹം. പലിശനിരക്ക് കുറയ്ക്കണമെന്നും ആവശ്യപ്പെട്ടിട്ടുണ്ടെന്ന് മുഖ്യമന്ത്രി പറഞ്ഞു. കേന്ദ്രസബ്സിഡി 2009 നു മുമ്പുള്ള വായ്പയ്ക്കും നല്കണമെന്ന് കേന്ദ്രത്തോട് ആവശ്യപ്പെട്ടിട്ടുണ്ട്. എന്നാല് കേന്ദ്രത്തിന്റെ മറുപടി ലഭിച്ചിട്ടില്ല. കേന്ദ്രം സഹകരിക്കാന് തയാറായാല് സബ്സിഡിയുടെ ഒരു വിഹിതം വഹിക്കാനും സംസ്ഥാന സര്ക്കാര് തയ്യാറാണ്.
മൊറട്ടോറിയം പ്രഖ്യാപിക്കണമെന്ന അഭിപ്രായത്തോട് സര്ക്കാരിന് വിയോജിപ്പില്ലെങ്കിലും അത് ഇപ്പോള് പെട്ടെന്ന് എടുക്കാവുന്ന തീരുമാനമല്ല. അണ്എയ്ഡഡ് സ്കൂളുകളിലെ അധ്യാപകര്ക്ക് ബാങ്ക് മുഖേന ശമ്പളം നല്കാന് തൊഴില് വകുപ്പ് നിര്ദ്ദേശിച്ചതായും മുഖ്യമന്ത്രി അറിയിച്ചു.
നദീസംയോജനം കേരളത്തിനു ബാധകമാവില്ലെന്നാണ് നിയമോപദേശമെങ്കിലും സുപ്രീംകോടതി ഈ ആശയത്തെ പൊതുവില് ഗുണകരമെന്ന് വിശേഷിപ്പിക്കുന്ന സാഹചര്യത്തില് ആവശ്യമായ കരുതല്, നിയമനടപടികള് സംസ്ഥാനം സ്വീകരിക്കുമെന്ന് മുഖ്യമന്ത്രി ഉമ്മന്ചാണ്ടി നിയമസഭയില് അറിയിച്ചു. 
പാതയോരത്തെ സംഘം ചേരലും ജാഥകളും നിയന്ത്രിക്കുന്നതുസംബന്ധിച്ച ഹൈക്കോടതി വിധി ആറ്റുകാല് പൊങ്കാലയെ ഒരു തരത്തിലും ബാധിക്കുകയില്ലെന്ന് മുഖ്യമന്ത്രി ഉമ്മന്ചാണ്ടി നിയമസഭയെ അറിയിച്ചു. സംഘം ചേരലും ജാഥകളും നിയന്ത്രിക്കുന്നതിനായി കേരള നിയമസഭ ഐകകണേ്ഠന പാസ്സാക്കിയ നിയമം നടപ്പിലാക്കുന്നതിനെതിരെ രണ്ടുപേര് കേരള ഹൈക്കോടതിയെ സമീപിച്ചതിനാലാണ് ഹൈക്കോടതിയുടെ നിരോധന ഉത്തരവുണ്ടായത്.
തിരുവനന്തപുരം: മുമ്പ് മത്സ്യതൊഴിലാളികളുടെ ബോട്ട് തകര്ത്ത ചൈനീസ് കപ്പലിനെ ഇടതുമുന്നണി സര്ക്കാര് വെറുതെവിട്ടതുപോലെ ഇറ്റാലിയന് കപ്പലിനെ വെറുതെ വിടില്ലെന്ന് മുഖ്യമന്ത്രി ഉമ്മന് ചാണ്ടി പറഞ്ഞു. 2008 ല് കണ്ണൂരില് ചൈനീസ് കപ്പല് നമ്മുടെ ബോട്ട് തകര്ക്കുകയും അബ്ദുള്ജലീല് എന്ന മത്സ്യതൊഴിലാളി മരിക്കുകയും ചെയ്തു. രണ്ടുപേര്ക്ക് പരിക്കേറ്റു. എന്നാല് 25 ലക്ഷം രൂപ കെട്ടിവെച്ച് അവര് പോയി. ഒരു നടപടിയുമുണ്ടായില്ല. 
തിരുവനന്തപുരം: മത്സ്യത്തൊഴിലാളികളെ വെടിവെച്ചുകൊന്ന ഇറ്റാലിയന് നാവികരെ നയതന്ത്ര ബന്ധത്തിന്റെ മറവില് രക്ഷപ്പെടാന് അനുവദിക്കില്ലെന്ന് മുഖ്യമന്ത്രി ഉമ്മന് ചാണ്ടി വ്യക്തമാക്കി. ഇറ്റാലിയന് അധികൃതരുടെ തടസ്സവാദങ്ങള്ക്ക് വഴങ്ങാതെ ശക്തമായ നടപടിയാണ് ഈ കേസില് സര്ക്കാര് സ്വീകരിച്ചിരിക്കുന്നത്. ഇന്ത്യന് നിയമത്തിന് ഇറ്റലി കീഴടങ്ങിയേ മതിയാകൂ. ഇക്കാര്യം കേന്ദ്ര സര്ക്കാരും വ്യക്തമാക്കിയിട്ടുണ്ട്.
കടലിലെ രക്ഷാപ്രവര്ത്തനങ്ങളില് കോസ്റ്റ്ഗാര്ഡിനു യാതൊരു വീഴ്ചയും പറ്റിയിട്ടില്ലെന്ന് മുഖ്യമന്ത്രി ഉമ്മന്ചാണ്ടി അറിയിച്ചു. അത്തരത്തിലുള്ള പ്രചരണം ശരിയല്ല. 
തീരദേശ സുരക്ഷയ്ക്കായി 10 തീരദേശ പോലീസ് സ്റ്റേഷനുകള് സ്ഥാപിക്കുമെന്നും കോസ്റ്റല് ഹോം ഗാര്ഡുകളായി തീരദേശ സ്റ്റേഷനുകളില് മത്സ്യത്തൊഴിലാളികളെ നിയമിക്കുമെന്നും മുഖ്യമന്ത്രി ഉമ്മന്ചാണ്ടി നിയമസഭയെ അറിയിച്ചു.
ഒമാനില് വാഹനാപകടത്തില് മരണമടഞ്ഞ അഞ്ചുമലയാളികളുടെ മൃതദേഹം എത്രയും വേഗം നാട്ടിലെത്തിക്കാനുള്ള സൗകര്യങ്ങള് ഏര്പ്പെടുത്തണമെന്ന് മുഖ്യമന്ത്രി ഉമ്മന്ചാണ്ടി കേന്ദ്രപ്രവാസികാര്യമന്ത്രി വയലാര് രവിയോട് ആവശ്യപ്പെട്ടു.
പോസ്റ്റുകള്
