കൊട്ടാരക്കര:മുന്‍മന്ത്രി ആര്‍.ബാലകൃഷ്ണപിള്ളയ്ക്ക് പ്രായാധിക്യത്തിന്റെ പേരില്‍ ജയില്‍ശിക്ഷയില്‍ ഇളവുനല്‍കുന്നത് അഡ്വക്കേറ്റ് ജനറലിന്റെ റിപ്പോര്‍ട്ട് പരിശോധിച്ചശേഷം തീരുമാനിക്കുമെന്ന് മുഖ്യമന്ത്രി ഉമ്മന്‍ചാണ്ടി. എ.ജി.യുടെ റിപ്പോര്‍ട്ട് ഇതുവരെ തന്റെ കൈവശം കിട്ടിയിട്ടില്ലെന്നും അദ്ദേഹം വ്യക്തമാക്കി. ഞായറാഴ്ച വൈകിട്ട് പിള്ളയെ വീട്ടിലെത്തി സന്ദര്‍ശിച്ചശേഷം മാധ്യമപ്രവര്‍ത്തകരോട് സംസാരിക്കുകയായിരുന്നു മുഖ്യമന്ത്രി.
അഡ്വക്കേറ്റ് ജനറല്‍ റിപ്പോര്‍ട്ട് സര്‍ക്കാരിന് നല്‍കിയിരിക്കാം. പക്ഷേ എന്റെ കൈയില്‍ കിട്ടിയിട്ടില്ല. അത് പരിശോധിച്ചശേഷം പ്രതികരിക്കാമെന്നും ഉമ്മന്‍ ചാണ്ടി പറഞ്ഞു. യു.ഡി.എഫിന്റെ നേതാവും ഘടകകക്ഷിയുടെ അധ്യക്ഷനുമാണ് പിള്ള. മുഖ്യമന്ത്രിസ്ഥാനമേറ്റശേഷം ഇതുവരെ നേരില്‍ കാണാന്‍ കഴിഞ്ഞിരുന്നില്ല. അതിനാലാണ് സന്ദര്‍ശിക്കാനെത്തിയത്. രാഷ്ട്രീയകാര്യങ്ങളും ആരോഗ്യകാര്യങ്ങളുമാണ് ചര്‍ച്ച ചെയ്തതെന്നും മുഖ്യമന്ത്രി പറഞ്ഞു. ശൂരനാട്ട് ഒരു പരിപാടിയില്‍ പങ്കെടുത്ത് മടങ്ങുംവഴിയാണ് മുഖ്യമന്ത്രി പിള്ളയുടെ വാളകത്തെ വീട്ടിലെത്തിയത്. അരമണിക്കൂറോളം സന്ദര്‍ശനം നീണ്ടു. അടച്ചിട്ട മുറിയിലായിരുന്നു സംഭാഷണം.
എന്നാല്‍ ശിക്ഷയില്‍ ഇളവുവേണമെന്ന് നിര്‍ബന്ധമില്ലെന്ന് ആര്‍.ബാലകൃഷ്ണപിള്ള മുഖ്യമന്ത്രിയുടെ സന്ദര്‍ശനശേഷം പ്രതികരിച്ചു. സര്‍ക്കാരില്‍നിന്ന് നീതി കിട്ടിയിട്ടില്ലെന്ന് എനിക്ക് അഭിപ്രായമില്ല.
നീതി കിട്ടേണ്ടിയിരുന്നത് കോടതിയില്‍ നിന്നാണ്. അത് കിട്ടിയില്ല.
പതാരം (കൊല്ലം):മലയാളഭാഷയ്ക്ക് അഭിമാനകരമായ സംഭാവനകള്‍ നല്‍കിയ ഡോ. ശൂരനാട് കുഞ്ഞന്‍പിള്ളയ്ക്ക് ഉചിതമായ സ്മാരകം നിര്‍മ്മിക്കുമെന്ന് മുഖ്യമന്ത്രി ഉമ്മന്‍ചാണ്ടി പറഞ്ഞു. ഭാഷാപണ്ഡിതനും മലയാള മഹാനിഘണ്ടുകാരനുമായ ഡോ. ശൂരനാട് കുഞ്ഞന്‍പിള്ളയുടെ ജന്മശതാബ്ദി ആഘോഷപരിപാടികള്‍ ഉദ്ഘാടനംചെയ്ത് സംസാരിക്കുകയായിരുന്നു അദ്ദേഹം. ഏതുതരത്തിലാവണം സ്മാരകമെന്നതു സംബന്ധിച്ച് സാംസ്‌കാരികവകുപ്പുമായി ആലോചിച്ചായിരിക്കും തീരുമാനമെടുക്കുകയെന്നും മുഖ്യമന്ത്രി പറഞ്ഞു.
കൊച്ചി മെട്രോ റെയില്‍ പദ്ധതി കേരളത്തിന്റെ അടിസ്ഥാന സൗകര്യ വികസനത്തിന് കുതിച്ച് ചാട്ടമാകുമെന്ന് മുഖ്യമന്ത്രി ഉമ്മന്‍ചാണ്ടി.കൊച്ചി മെട്രോ റെയില്‍ അനുബന്ധ പദ്ധതി നിര്‍മാണോദ്ഘാടനം എറണാകുളം ടൗണ്‍ഹാളില്‍ നിര്‍വഹിക്കുകയായിരുന്നു അദ്ദേഹം. പദ്ധതി വിജയമായാല്‍ കേരളത്തിന്റെ തെക്ക്- വടക്ക് ജില്ലകളെ ബന്ധിപ്പിച്ച് അതിവേഗ കോറിഡോര്‍ ട്രെയിന്‍ സര്‍വീസുകള്‍ ആരംഭിക്കാന്‍ സാഹചര്യമൊരുങ്ങും.ഇത്തരം പദ്ധതികള്‍ ഭാവി വികസന പ്രവര്‍ത്തനങ്ങള്‍ക്ക് കരുത്ത് പകരും.അടിസ്ഥാന സൗകര്യ വികസനം, വിദ്യാഭ്യാസം,ആരോഗ്യം എന്നിവയില്‍ മുന്നിലെത്താന്‍ രാഷ്ട്രീയാധീതമായ പ്രവര്‍ത്തനം പൊതുപ്രവര്‍ത്തകരില്‍ നിന്ന് ഉണ്ടാകണം.ദല്‍ഹി മെട്രോ റെയില്‍ എം.ഡി ഇ. ശ്രീധരന്റെ സാന്നിധ്യവും നേതൃത്വവും പദ്ധതിയുടെ കരുത്താണെന്നും അദ്ദേഹം ചൂണ്ടിക്കാട്ടി.
ജനങ്ങളെ ചൂഷണം ചെയ്‌തുകൊണ്ടുളള ചില മരുന്ന്‌ ഉല്‍പാദകരുടെയും വിതരണക്കാരുടെയും നടപടി ഇനിയും അനുവദിക്കുകയില്ലെന്നും മെഡിക്കല്‍ സര്‍വീസസ്‌ കോര്‍പറേഷനെ ശക്‌തിപ്പെടുത്തി ഇക്കാര്യത്തില്‍ കാര്യക്ഷമമായ ഇടപെടലിനു സര്‍ക്കാര്‍ തയാറെടുക്കുകയാണെന്നും മുഖ്യമന്ത്രി ഉമ്മന്‍ചാണ്ടി. കോട്ടയം ജില്ലാ ആശുപത്രിയിലെ നവീകരിച്ച അത്യാഹിതവിഭാഗം ഉദ്ഘാടനം ചെയ്യുകയായിരുന്നു അദ്ദേഹം. 
പോസ്റ്റുകള്
