ചെങ്ങന്നൂര്‍: ശതാഭിഷിക്തനായ ശബരിമല വലിയ തന്ത്രിയ്ക്ക് ആശംസയേകാന്‍ മുഖ്യമന്ത്രി ഉമ്മന്‍ചാണ്ടി താഴമണ്‍ മഠത്തിലെത്തി. ശബരിമല തന്ത്രിയായ കണ്ഠരരു മഹേശ്വരരാണ് 84ന്റെ നിറവില്‍ ശതാഭിഷിക്തനായത്. ഇന്നലെ രാവിലെ കുടുംബ ക്ഷേത്രത്തില്‍ വിവിധ പൂജകളും ഹോമങ്ങളോടുമാണ് ശതാഭിഷേക ചടങ്ങുകള്‍ ആരംഭിച്ചത്.
കുടുംബ ക്ഷേത്രത്തില്‍ നടന്ന ചടങ്ങ് ദര്‍ശിക്കാനും വലിയ തന്ത്രിക്ക് ആശംസകള്‍ നേരാനുമായി ബന്ധുക്കളും നാട്ടുകാരും അടക്കം നൂറുകണക്കിന് ആളുകളാണ് സംസ്ഥാനത്തിന്റെ വിവിധ ഭാഗങ്ങളില്‍ നിന്നും എത്തിച്ചേര്‍ന്നത്. 10.15 ഓടെ തന്ത്രി കണ്ഠരരു മഹേശ്വരരേയും ഭാര്യ ദേവകീദേവി അന്തര്‍ജനത്തെയും പ്രത്യേക പീഠത്തിലിരുത്തിയശേഷം ആലുവാ തന്ത്ര വിദ്യാപീഠം ജനറല്‍ സെക്രട്ടറി മുല്ലപ്പള്ളി കൃഷ്ണന്‍ നമ്പൂതിരി ചടങ്ങുകള്‍ക്ക് നേതൃത്വം നല്‍കി. കൃഷ്ണന്‍ നമ്പൂതിരിയും കണ്ഠരരു മോഹനരരും ചേര്‍ന്ന് വലിയ തന്ത്രിയുടെ ശിരസില്‍ ശതാഭിഷേക കലശാഭിഷേകം നടത്തിയതോടെ ചടങ്ങുകള്‍ക്ക് സമാപ്തിയായി. മുഖ്യമന്ത്രിയുടെ പൊളിറ്റിക്കല്‍ സെക്രട്ടറി കെഎസ് വാസുദേവ ശര്‍മ, കൊടിക്കുന്നില്‍ സുരേഷ് എം പി, തിരുവിതാംകൂര്‍ ദേവസ്വം ബോര്‍ഡ് പ്രസിഡന്റ് അഡ്വ. എം രാജഗോപാലന്‍ നായര്‍ എന്നിവരും ആശംകള്‍ നേര്‍ന്നു.
പോസ്റ്റുകള്
